រថយន្តប្រព្រឹត្តបទល្មើសព្រៃឈើនៅស្រុកឆែប ខេត្តព្រះវិហារ ក្រឡាប់បណ្តាលឱ្យស្លាប់ម្នាក់ និងរបួសធ្ងន់ស្រាល២នាក់
04-February-2020 | ដោយ ពលមនសិការ
ព្រះវិហារ៖ បុរសម្នាក់បានស្លាប់ និង២នាក់ទៀត រងរបួសធ្ងន់ស្រាល ក្នុងករណីគ្រោះថ្នាក់ចរាចរណ៍បង្កដោយខ្លួនឯង ក្រឡាប់រថយន្ត ដែលកំពុងផ្ទុកបទល្មើសព្រៃឈើ កាលពីវេលាម៉ោង៨យប់ ថ្ងៃទី៣ ខែកុម្ភៈ ឆ្នាំ២០២០ នៅផ្លូវបំបែកចូលភូមិដងផ្លិត លើកំណាត់ផ្លូវជាតិលេខ៩ ចំណុចបង្គោលគីឡូម៉ែត្រលេខ៥៤១ ក្នុងភូមិសាស្ត្រឃុំឆែបមួយ ស្រុកឆែប ខេត្តព្រះវិហារ។
លោកវរសេនីយ៍ឯក ឈួរ ម៉ាឌី អធិការនគរបាលស្រុកឆែប ខេត្តព្រះវិហារ បានឲ្យដឹងនៅព្រឹកថ្ងៃទី៤ ខែកុម្ភៈ ឆ្នាំ២០២០នេះថា មុនពេលកើតរថយន្ត កើតហេតុខាងលើ បានបើកបរក្នុងល្បឿនលឿនចេញពីភូមិដងផ្លិត លុះដល់ចំណុចកើតហេតុផ្លូវបត់ស្តាំលើកំណាត់ផ្លូវជាតិលេខ៩ ដោយសារយកចង្កូតមិនទាន់ក៏ខ្លាចមានសមត្ថកិច្ចតាមក្រោយក៏ជ្រុលចង្កូត ធ្លាក់ផ្លូវខាងឆ្វេងដៃបណ្តាលឲ្យក្រឡាប់រេលឈើសង្កត់ស្លាប់ម្នាក់ និងរងរបួសធ្ងន់ស្រាល២នាក់។
លោកបានបន្តថា ជនរងគ្រោះដែលស្លាប់មានឈ្មោះ តេង ធូ ភេទប្រុស រស់នៅភូមិចុងអង្ក្រង សង្កាត់សួង ក្រុងសួង ខេត្តត្បូងឃ្មុំ ជាអ្នកបើកបររថយន្តម៉ាករ៉េវ៉ូពណ៌ត្រេអ៊ី ពាក់ស្លាកលេខខេមរៈភូមិន្ទ 2.1969 ដឹកឈើប្រភេទទ្វាចំនួន១៦វង់។ ដោយឡែក អ្នករួមដំណើរមានទី១.ឈ្មោះ ពេជ្រ ភេទប្រុស អាយុ១៧ឆ្នាំ រស់នៅភូមិគុណភាព ឃុំឆែបពីរ ស្រុកឆែប ខេត្តព្រះវិហារ របួសស្រាល និងទី២.ឈ្មោះ ពោ អ៊ីកា ភេទប្រុស អាយុ១៩ឆ្នាំ រស់នៅភូមិ.ឃុំសាមគ្គី ស្រុកឧត្តុង្គ ខេត្តកំពង់ស្ពឺ រងរបួសធ្ងន់។
ក្រោយហេតុការណ៍នេះកើតឡើង សមត្ថកិច្ចបានចុះទៅពិនិត្យដល់កន្លែងកើតហេតុភ្លាមៗ និងបានបញ្ជូនជនរងគ្រោះ២នាក់ ទៅព្យាបាលនៅមណ្ឌលសុខភាពឆែប និងបញ្ជូនបន្តទៅមន្ទីរពេទ្យបង្អែក ១៦ មករា ខេត្តព្រះវិហារ ចំណែកសាកសពបានទាក់ទងទៅក្រុមគ្រួសារដើម្បីមកទទួលយកទៅធ្វើបុណ្យតាមប្រពៃណី។
តាមមជ្ឈដ្ឋានមួយចំនួនបានខ្សឹបប្រាប់បន្ថែមថា រថយន្តខាងលើនេះ ត្រូវបានគេស្គាល់ថាដឹកបទល្មើសព្រៃឈើជាប្រចាំ តែសមត្ថកិច្ចនៅទីនោះ ហាក់បីសំងំឈឹង ជាពិសេសផ្នែករដ្ឋបាលព្រៃឈើឆែបតែម្ដង ប្រហែលជាមានលាភសក្ការៈអស់ហើយក៏ថាបាន៕
ចំនួនអ្នកទស្សនា
- ថ្ងៃនេះ3761
- ម្សិលមិញ15681
- សប្តាហ៍នេះ62601
- ខែនេះ84481
- ឆ្នាំនេះ84481
- សរុប20526937